Mat 27 | MEU | STEP | Daba e rere, hahelaḡa taudia iboudiai bona hanua tau-badadia e henega bou, Iesu ialana totona;

Matthew 27

Iuda Iskariote e mase

1 Daba e rere, hahelaḡa taudia iboudiai bona hanua tau-badadia e henega bou, Iesu ialana totona; 2 bena e ḡuia, e hakaua lao, Pilato, gavana tauna, e henia.

3 Iuda, tao-tore tauna, ese Iesu e itaia, ia ese vada e revaia; bena e helalo, hari silver monidia toi-ahui-osi e loulai, hahelaḡa taudia bona hanua tau-badadia e henidia lou, 4 eto, Vada na kara dika, badina be asi ena kerere tauna taona vada na torea. Idia eto, Ai ese a? Oi sibomu. 5 Ia ese silver monidia Dubu Helaḡa lalonai e taho vareai, bena e raka oho, ela, sibona eha hemata. 6 Bena hahelaḡa taudia ese hari silver monidia e abi, eto, Dia namo boubou mauana ai baita uda, badina be ina na rara davana. 7 E henegalaia, bena uro ikarana tauna ena tano e hoilaia, idau bese taudia iguridia gabuna ai vada e halaoa. 8 Una dainai, una tano ladana e hatoa “Rara Tanona” ema bona hari. 9 Unu amo Ieremia, peroveta tauna, ena hereva vada e momokani, eto, Silver monidia toi-ahui na abi, Israel taudia ese davana e gwauraia tauna davana, 10 uro ikarana tauna ena tano na hoilaia, Lohiabada ese e haduagu heḡereḡerena.

Iesu Pilato vairanai

11 Iesu na gavana vairanai e gini: bena gavana ese e nanadaia, eto, Oi na Iuda taudia edia pavapava eiava? Iesu eto, O ena vada o gwaumu. 12 Bena hahelaḡa taudia bona hanua tau-badadia ese ma e habadelaia, to ia na se haere. 13 Bena Pilato eto, Hahebade herevadia momo e habadelaimumu na to kamonaimu a? 14 To Iesu na se haere, hereva ta se gwauraia. Taunabunai gavana na e hoa. 15 Una aria negana ai, gavana na vaia ena kara dibura rumana ai e nohomu tauna ta, hutuma ese bae gwauraia tauna, baine ruhaia nege. 16 Una negana ai, tau ta dibura rumana ai e nohova, ladana na Baraba; una tau harina na bada. 17 Taunabunai, idia na e hebou vaitani negana ai, Pilato ese e nanadaidia, eto, Daika o ura heniamu baina ruhaia nege, Baraba eiava Iesu, e nemaia Keriso. 18 Badina be Pilato dibana idia na vaḡeḡe dainai taona e torea.

19 Pilato na hahemaoro gabuna ai, ena helai ḡauna latanai helaina ai, adavana ese ena gwaukau e siaia lao dekena ai, eto, Una kara maoromaoro tauna enai ḡau ta basio karaia, badina be hari dina ai vada na nihi, egu nihi ai hisi badana ese e hadikagu ia dainai.

20 A hahelaḡa taudia bona hanua tau-badadia ese aru taudia lalodia e ani, Baraba iruhana bona Iesu iala-masena bae gwaurai. 21 Bena gavana ese ma e nanadaidia, eto, Idia raruosi daika baina ruhaia umui emui? ldia eto, Baraba. 22 Bena Pilato ma e nanadaidia, eto, O Iesu, Keriso e nemaia, na ede baina tomaia? Idia iboudiai e haere bou, eto, Ba hasatauroa. 23 Pilato eto, Be, ena dika be dahaka? A idia na e lolo lalo-dika, eto, Ba hasatauroa.

24 Taunabunai Pilato lalona e parara, ena hereva na basine goada, bona edia heloḡo-heloḡo eha badava; bena ia ese ranu e abia, aru taudia vairadiai imana e huri, eto, Ina kara maoromaoro tauna rarana na dia lau latagu ai; umui sibomui. 25 Idia iboudiai e haere, eto, Ia rarana be ai latamai ai bona natumai latadiai. 26 Bena ia ese Baraba e ruhaia nege, a Iesu e dadabaia, bena e henidia, bae hasatauroa.

Iesu e ḡonaḡonalaia

27 Bena gavana ena tuari taudia ese Iesu e hakaua lao, edia gima rumana lalonai, bena edia orea taudia iboudiai e gogodia ia dekenai. 28 Idia ese ena dabua e kokia oho, dabua kakakakana e hakaralaia; 29 bona havava ḡauna ḡiniḡini a e hatua, ia kwarana ai e atoa kau; siriho auta danu imana idibana ai e hakahulaia. Bena tuidia e hadai, e toma henia diho koikoi, eto, Iuda pavapavana e! Ba mauri! 30 Bena e kanudia, bona hari siriho e abihaia, kwarana e botalaia. 31 E ḡonaḡonalaia vaitani, bena dabua kakakana e kokia oho, ena dabua korikorina ma e hakaralaia. Bena e hakaua lao, bae hasatauroa.

Iesu e hasatauroa

32 E raka lasiva ai, Kurene tauna ta e davaria, ladana na Simona, bena e haduaia, Iesu ena satauro baine huaia. 33 Gabu ta ai e lasi, ladana na Golgota; anina be “kwara koukouna tanona”. 34 Unuseni ai vine ranuna muramura ida e buloa na e henia, baine inua; to e demaia toho, inuna se ura. 35 Bena e hasatauroa; bona mari amo ena dabua e hari. 36 Bena e helai diho, e gima. 37 Ia kwarana daenai idia ese hahebade herevana e kapaia, ini e torea toma: INA NA IESU, IUDA PAVAPAVANA. 38 Ia ida nega tamona dadidadi taudia rarua e hasataurodia, ta idibana kahana ai, ta laurina kahana ai.

39 E raka hanai taudia ese e hereva dika henia, kwaradia e taiko-taiko, 40 eto, I! Dubu Helaḡa ba rohoa ma dina toi ai ba larebaia lou taumu, sibomu ba hahemauri. Oi Dirava Natuna o tomamu, satauro amo boma dada dobi. 41 Hahelaḡa taudia bona itorena taudia bona hanua tau-badadia ese danu e ḡonaḡonalaia, eto, 42 Ia na idau taudia e hamauridiava, matona sibona se hahemauri. Ia na Israel pavapavana, harihari satauro amo aine dada dobi, bena baita abidadama henia. 43 Ia ese Dirava e abidadama heniava; Dirava ese bena lalokau henia, bema hamauria: badina be ia eto “Lau na Dirava Natuna”. 44 Dadidadi taudia raruosi danu, ia ida e hasataurodia taudia, ese unu e ḡonaḡonalaia toma.

45 Dina tubua amo dibura ese tanobada idoinai e gorua ahu, ela bona dina e ḡelo. 46 Bena dina ḡelona sisivana Iesu e lolo, eto, Eloi, eloi lama sabaktani; anina be Egu Dirava e, egu Dirava e, dahaka lau ome rakatanigu. 47 Unuseni ai e gini taudia haida na e kamonai, bena eto, Ia na Elia e boiriamu. 48 Bena ta e heau lao, puta ta eha abia, vine ranuna iditana ai e urua diho, siriho ai e gwadaia kau, bena e duduia dae, baine topoa eto. 49 A haida be eto, Mani do: aita itaia, Elia bainema baine hamauria eiava. 50 A Iesu ma e lolo dagu, bena e mase. 51 Una negana ai Dubu Helaḡa seseahuna e hedare parara, atai amo ema bona henu. Tano danu e laga, papapapa e parara; 52 bona mase garadia e hekeho, helaḡa taudia hutuma na e tore isi. 53 Bena ena tore-isi-lou murinai idia na gara amo e raka lasi, hanua helaḡana ela, unuseni ai hutuma ese e itadia.

54 Tuari biaguna mai bamona ida, Iesu e gimaia taudia, ese tano-laga bona e vara ḡaudia e ita, bena e gari bada, eto, Momokani, ina na Dirava Natuna. 55 Herarai hahinedia diaḡau danu dauhai e gini; Galilea amo Iesu murinai e rakava bona isiaina e lao heniva hahinedia bunu. 56 Haida bini: Maria, hane Magdala; bona Maria, Iakobo bona Iosef sinadia; bona Sebedeo natuna sinadia.

Iesu e guria

57 Adorahi ai, taḡa tauna ta, ladama Iosef, Arimatea amo e kau; ia danu Iesu ena hahediba ta. 58 Ia na Pilato dekena ela, e noia, Iesu tau-anina baine abia eto, bena Pilato na e hahedua bae henia. 59 Taunabunai, Iosef ese tau-anina e abia dobi, dabua ḡoevaḡoevana ai e kumia, 60 nadi hagana ai e ḡeia kohuana matamatana ta, ia sibona ena, lalonai e atoa; nadi badana amo kohua iduarana e kurea ahu, bena e raka oho. 61 A hahine rarua, Maria, hane Magdala, bona Maria ta, be kohua vairanai e helaiva.

62 Daba ai, haheḡoeva dinana murina dinana ai, hahelaḡa taudia bona Farisea taudia Pilato vairanai e hebou, 63 eto, Ḡaubada e, ai na ame helalo une, una koikoi tauna be maurina ai e hereva, eto “Dina toi bae ore, bena lau ma baina tore isi lou”. 64 Taunabunai, mani ba hahedua, gara bae gimaia namonamo ela bona dina ihatoina; ena hahediba baela, tau-anina bae henaoa, bena taunimanina bae koidia, baeto “Ia na mase amo vada e tore isi lou”, na garina. Unu bema heto, koikoi gabena ese koikoi gunana bema hereaia. 65 Pilato eto, Be, umui na mai emui hegima taudia; vada aola, gara ba ha koua, emui goada heḡereḡerena. Bena idia na ela, gara eha koua kunuka-kunuka, toa ta nadi ai e atoa, bena kito taudia e habadinalaidia.

66